Rumble in di naija jungle round two won begin o, my country people. For red corner  with red shotoko na presido Goodluck Jonah and for blue corner in blue shokoto na house of reps people.  Make I give una smal background gist.

Round one:

For democrazy day, here for naija tori we report say presido and house of rep people dey do blame game, presido say if im send bill to rep people dey go change everything inside, the bill no come resemble di tin wey im send, so e go no sign am into law

Round two:

Today, house of rep people don fire back. Dem say dem go begin road to pass resolution wey go give dem sef power to overrule presido’s veto. Daily trust say dem talk to Chairman of House commitee on Rules and Business, Albert Tsokwa (PDP, Taraba) for phone and the man talk say legislature people no dey happy with prez Jonah and di executive behaviour.Oga chiarman say

”We will vote with 2/3 majority in both Senate and House to override his veto and we should not be misunderstood to be confrontational. We understand that they (executive) said that they won’t sign any bill that is not initiated by the executive that they will not honour it”

Oghene biko!! This one na ”Operation My Powere Pass Ya Power” Laugh wan kill me die here. E be like say all dis people don over shack sapele water. Power drunk president and power drunk legislature. This na tragic comedy, wey nollywood? See film O. Naija people don suffer, na dis kind nama people wey dey run our country? Dem no know wetin be  ‘compromise’ ? The one wey even suprise pass be say na PDP vs PDP dey fight for our front. Opposition no need to do any work since PDP wan take dia own hand destroy demsef.

Tsokwa, Oga chairman, say na only one bill since June 6 last year wey prez Jonah don sign and dat bill na the 2012 Appropriation Act and the Transfer of Convicted Prisoners amendment Act. Oda bills we presido no wan sign na; the Public Procurement Amendment Bill, Legal Aid Council Bill, National Health Bill, the Bill on people with disability, National Assembly Budget and Research Office Establishment Bill, Tobacco Bill, State of the Nation Address Bill, FCT Area Courts Bill, and National Assembly Service Commission Repeal and Re-enactment Bill etc. according to daily trust.

Una see? Bill wey no concern money no wahala but bill wey money matter dey, wahala don enter.  Na how dey go share naija money for dem sef dey cause dis trouble , if no be say I get Jesus mind I for swear for dis people. Nonsence!

Leave a Reply

Your email address will not be published.