See as dem dey call money for naija! Our people talk say, di bottom of weath sometimes, na dirty tin to talke eye see. Huhuonline de report say EFCC carry Timipre Sylva go court on June 5, 2012 sake of sey im chop money when im be govunor of Bayelsa. No be anyhow money o, na six count charge for fraud, criminal wahala, conspiration to chop N2bn. Lawyer dem dey argue front and back, charge and bail, no charge and bail .Judge say na on 7th June im go give report weda bail go dey or bail no go dey , in di meantime oga former govunor go chilax inside cell till then. Naija people! make i list some of di charges
Dat you oga Timipre Sylva, as Governor of Bayelsa State togeda wit oda people wey don run comot conspire to convert property and oda metcha excetera wey reach N2bn wey belong to Bayelsa State
Dat you oga Timipre Sylva, as Governor of Bayelsa State togeda wit oda people wey don run comot perform magic with N380Million property wey belong to Bayelsa State Gogovm,ent convert am for Bureu De Change Operator with Account No. 221433478108, in Fin Bank, Plc to ya own.
Count 3 (count neva finish?)
Dat you oga Timipre Sylva, as Governor of Bayelsa State togeda wit oda people wey don run comot convert again ,(dis man na serious converter, if you get Timipre for house, no need for NEPA) N50Million property again (how many property one person go live inside) wey belong to Bayelsa Govment through account of one Enson Benmer Limited with Account No. 6152030001946, in First Bank to ya own
I suprise say Bayelsa still get house, anytin remain dia? I know say ya partners in crime don run comot but person wey take advide odas give am still make choice. I hope dis is a new dawn for naija make all di thief dem begin dey face justice. Ejoo!